Lillia Ma... u'est Mimiu?
Mimiu (chin sa caratza)
Mimiu non che est!
Lillia E tue chie ses?
Mimiu (chin sa caratza)
Eo so Birimbinu, unu bellu pitzoccu!
Lillia (li bogat sa caratza)
Ah! Mimiu ses! Ite caratza allegra chi giughes!
Mimiu E cust'àtera est pro a tie... ponedila! (li dat una caratza)
Lillia Custa caratza non mi piaghet!
Mimiu Est una caratza... pro giogare!
Lillia Custa non la cherzo. Eo cherzo cussa allegra.
Mimiu Nono! Custa est sa mia e mia abbarrat!
Lillia Ah! Gai est? E tando ti la furo! (l'istratzat sa caratza)
Mimiu Torramila deretu!
Lillia Le', lèadi custu! (li dat unu ciafu)
Mimiu E tue lèadi custu! (li dat unu ciafu) Làssala!
(sos duos s'aggantzant e Mimiu si leat torra sa caratza sua)
Lillia Daemila! Brigantinu!
Mimiu Brigantina ses tue! (essit)
Lillia (pianghende)
Sas cosas bellas si las leat sempre isse...
(cumintzat sa música de "Giogare-giò)
Mimiu (torrat)
Galu annicada ses? Dae, ca giogamus paris, dae!
(Mimiu e Lillia cantan)
Giogare-giò
giogare-giò
a cua-cua
e a tene-tè...
Giogare-giò
brincare-brí
sartiare-sà
a funedda-fú...
Giogare-giò
bugliare-bu
fàghere finta
de bolare-bo...
Giogare-giò
ballare-ba
fàghere su dillu
a dílliri-dí
Giogare-giò
cantare-cà
a trallallero
lallero-la-là
Giogare-giò
girare-gì
ruere a terra
a tumbu-tu-tú...