Mussi Oje cherzo fàghere una búglia a Chica. (si ponet sa caratza
de cucu)
Cu-cu...Chica bella, ue ses?
(Chica intrat a furinu e atacat a sa coa de Mussi unu picarolu)
Mussi Cu-cu...Chica bella, ue ses?
Cu-cu... cu-cu...
(movèndesi faghet una drìnnida chin su picarolu)
Ma... it'est custu sonu? Cu-cu... cu-cu...
(comente si movet torrat su dringhi-dringhi)
Ma... dae ue benit custu burdellu?
(si girat e su picarolu sonat piús de a prima)
Chica (intrat) Tziu Cucu, proite sezis sonende sas càmpanas?
Pasca de Abrile est oje?
Mussi Eo no isco... eo no isco...
(piús si girat a pompiare e piús su picarolu sonat. A sa fine si nde
bogat sa caratza)
Chica Ah! Tue ses, Mussi? Ma... su boe de Santu Sidore
cheres fàghere chin custu picarolu in sa coa?
Mussi Ah! Chica! Ses tue chi m'as postu custu picarolu in sa
coa!
Chica Est solu unu giogu...oje est sa die de sas búglias (ridet)
aha... aha...
Dae, cantamus!
(Chica e Mussi cantan)
A sa festa de pane e azu
eo mi sono su sonazu
don-do-ron-dón a mi giogare
don-do-ron-dón a mi ballare
don-do-ron-dón e don-do-ron-dón
don-do-ron-dón e don-do-ron-dón
A sa festa de su ranzolu
eo mi sono su pipiajolu
pi-fi-ri-sí a mi giogare
pi-fi-ri-sí a mi ballare
pi-fi-ri-sí e pi-fi-ri-sí
pi-fi-ri-sí e pi-fi-ri-sí
A sa festa de tzarra-tzarra
eo mi sono sa chitarra
dlan-da-la-dlàn a mi giogare
dlan-da-la-dlàn a mi ballare
dlan-da-la-dlàn e dlan-da-la-dlàn
dlan-da-la-dlàn e dlan-da-la-dlàn